Վարորդներին

Ընդհանուր դիսպետչերական կենտրոնը մարդկանց հնարավորություն է տալիս՝ հիշելով ընդամենը մեկ հեռախոսահամար՝ Ընդհանուր դիսպետչերական կենտրոնի համարը, զանգահարել ու տաքսի պատվիրել հենց այն տարածք, որտեղ իրենք տվյալ պահին գտնվում են:  Եվ պատվիրատուին կմոտենա այն մեքենան, որն ամենից մոտն է գտնվում, անկախ նրանից, թե որ տաքսի ծառայությանն է պատկանում, եթե այդ ծառայությունը մեր միասնական համակարգի գործընկերն է:

Մեր համակարգում մարդկային գործոնը նվազագույնի է հասցված: Պատվիրատուի հայտը մտնում է սերվերի տվյալների բազա և տարածվում բոլոր տաքսիներին, որոնք գտնվում են տվյալ պատվիրատուից որոշակի սահմանափակ հեռավորության վրա:

Վարորդները, որոնք ամենամոտն են գտնվում պատվերի հասցեին, կարող են ինքուրույն ընտրել պատվերը:

Մեքենաների GPS նավիգատորների մեջ (դրանք տեղադրված կլինեն մեզ հետ համագործակցող բոլոր մեքենաներում) կա ծրագիր, որը ապահովում է վարորդի կապը  հաճախորդների պատվերներն ընդունող միասնական սերվերի հետ:

Դուք ինքներդ ընտրում եք պատվերը և հաստատում այն՝ կոճակի սեղմումով: Սերվերն արագ ստուգում է, թե արդյոք մինչ այդ չկան նույն պատվերն ընտրած վարորդներ: Եվ դրանից հետո պատվերն ամրագրվում է Ձեր անունով: Ոչ ոք դրանից հետո չի կարող վերցնել տվյալ պատվերը: Ձեզ մնում է ընդամենը նշել, թե որքան ժամանակից կլինեք պատվերի հասցեում: Այդ տեղեկությունը ստանում է նաև պատվիրատուն՝ SMS-ի կամ ձայնային հաղորդագրության ձևով: Ծանուցման մեջ նշվում է տաքսի ծառայության անունը, ավտոմեքենայի մակնիշն ու համարանիշը:

Երբ որ Դուք հասնում եք պատվիրատուի նշած վայրը, Ձեր հեռախոսի կամ GPS նավիգատորի վրա կոճակ եք սեղմում և պատվիրատուին SMS-ով կամ ձայնային հաղորդագրության միջոցով տեղեկացնում ժամանելու մասին:

Սպասարկման որակի արմատական բարելավման համար, որն ի վերջո անպայման կազդի նաև պատվերների քանակի աճի վրա, Ընդհանուր դիսպետչերական կենտրոնի հետ համագործակցող յուրաքանչյուր վարորդ և տաքսի ծառայություն պետք է հետևի որոշակի չափանիշների. 

• վարորդները պետք է պատշաճ հագնված լինեն, լինեն մաքուր և սափրված,
• մեքենայում հաճախորդի ներկայությամբ չեն ծխի,
• եթե հարկ լինի՝ կօգնեն բացել բեռնախցիկը, կօգնեն դնել կամ հանել ուղեբեռը,
• մեքենա վարելիս չեն խոսի հեռախոսով,
• ուղևորության ողջ ընթացքում չեն հայհոյի և չեն բողոքի կյանքի դժվարություններից,
• պատվիրատուից երթևեկության վճարը ստանալիս կվերադարձնեն մանրը, իսկ թեյավճարը կթողնեն հաճախորդի հայեցողությանը,
• մեքենան պետք է լինի սարքին վիճակում, լվացված և մաքուր: 

Ահա այն ամենը, ինչ պահանջվում է Ձեզանից: Բայց փոխարենը՝ Ձեր եկամուտները կլինեն 30-40 տոկոսով սովորականից ավել և կկազմեն օրական առնվազն 3000-5000 դրամ:

Ըստ վիճակագրության՝ տաքսու վարորդները օրական ձմռանը կատարում են 20-24 պատվեր, իսկ ամռանը՝ մինչև 30-34 պատվեր:

Վարորդները, որոնք կաշխատեն մեր համակարգի միջոցով, կարող են օրական ձմռանը կատարել 30-32 և նույնիսկ ավելի պատվեր, իսկ ամռանը՝ 42-44 և ավելի:

Մենք արդեն նկարագրեցինք համակարգի աշխատանքի առանձնահատկությունները, որն ունակ է ավելացնելու պատվերների քանակը: Սա միանշանակ է: Համակարգն աշխատում է անդադար և վերահսկվում է սերվերի կողմից: Այսպիսով՝ ոչ մի առաջնահերթություն վարորդներից որևէ մեկին պատվեր տրամադրելու հարցում չկա:  Իսկ համակարգի անընդհատ աշխատանքը ապահովում է պատվերների ժամանակին կատարումը:

Նոր ներդրված համակարգը անկասկած ձեռնտու է Ձեզ նաև այլ պատճառներով:

Ընդհանուր դիսպետչերական կենտրոնի համակարգը առաջին հերթին ուշադրություն է դարձնում հաճախորդների սպասարկման արագության վրա: Իսկ դա նշանակում է, որ մեր համակարգի կիրառումով պատվերների ստացման արագությունը ևս բազմակի կաճի:

Ձեզ մեր համակարգը ձեռնտու է նաև նրանով, որ օգնում է նվազագույնի հասցնել ճանապարհի վրա Ձեր ծախսած ժամանակը և ապահովում է հաճախորդների մեծ թվով:

Ավելորդ չի լինի նշել, որ այն համակարգով, որից ներկայումս օգտվում են վարորդները, հարկ է լինում երկար ճանապարհ կտրել հերթական հաճախորդին հասնելու համար: Մեզ մոտ այդ բանը հնարավոր չէ: Վարորդը ինքն է ընտրում իրեն ամենամոտ հասցեի պատվերը: Իսկ պատվերը կատարելուց հետո նույն տարածքում գտնում է նոր պատվիրատու: Այսպիսով մեր համակարգը հնարավորություն է տալիս օրվա ընթացքում նվազագույնի հասցնել պարապուրդը և կատարել առավելագույնս շատ պատվերներ:

Նոր համակարգի աշխատանքին, նրա առավելություններին ավելի դիտարժան ծանոթացնելու համար Ձեզ ենք ներկայացնում մեր պատկերավոր տեսահոլովակները: